شاومي أعلنت بشكل رسمي عن بداية إرسال تحديث HyperOS 3 المبني على Android 16 لهواتف سلسلة Xiaomi 15 عالميًا، بعد ما بدأت التحديث الأسبوع اللي فات على سلسلة Xiaomi 15T. والتحديث جاي مع مميزات جديدة وتحسينات ملحوظة في الأداء والواجهة.
حجم التحديث ورقم الإصدار
التحديث وصل لموبايل Xiaomi 15 برقم إصدار 3.0.4.0.WOCEUXM، وحجمه حوالي 8.2 جيجا، فضروري يكون عندك مساحة كفاية قبل التحميل. ولو كنت مشارك في النسخة التجريبية، حجم التحديث هيبقى أصغر.
التحديث متوفر لمين حاليًا؟
حالياً التحديث في مرحلة الإطلاق الأولى، ومتوفر لمستخدمين محددين في الاتحاد الأوروبي. خلال الأيام الجاية التحديث هيوصل لعدد أكبر من المستخدمين حول العالم.
المميزات الجديدة في HyperOS 3 (Android 16)
التحديث جاي بمميزات كتير، وأبرزها:
- واجهة جديدة بتصميم أحسن بصريًا
- ميزة Super Island شبيهة بـ Dynamic Island في آيفون
- خلفيات شاشة قفل سينمائية
- حركة وانيميشنز أنعم وأسرع
- تحسين استهلاك البطارية وأداء الجهاز بشكل عام
أهم التحسينات اللي جاية مع التحديث
تحسينات الأداء
- تحسين طريقة توزيع الذاكرة علشان الجهاز يبقى أسرع
- تحسينات في استهلاك الطاقة
- زيادة استقرار النظام أثناء الاستخدام
تحسين الرسوميات والأنيميشن
- الرسوم بقت أخف وأسرع في العرض
- انيميشن أنعم في أكتر من 100 مكان في النظام
التوصيل بين الأجهزة (Interconnectivity)
واحدة من أقوى المميزات في التحديث ده، إن شاومي فعلاً بدأت تعمل نظام بيشبّه بيئة Apple من حيث الربط بين الأجهزة:
- تقدر تشوف معرض الصور بتاعك على iPhone من خلال سحابة شاومي
- فتح الموبايل من خلال بصمة أو Face ID من جهاز تاني
- مشاركة الملفات أسرع
تحسينات لتطبيقات النظام
- تحسين واجهة تطبيق المعرض وإضافة Widgets جديدة
- تحسين صفحة الطقس بشكل تفاعلي
- تعديل تقويم النظام وعرض أسبوعي جديد
- تحسين تطبيق التسجيل مع إزالة الضوضاء
الخصوصية والأمان
شاومي ضافت طبقات حماية أعلى للبيانات، وبقت التطبيقات تقدر تستخدم بيانات معينة بس بإذن منك.
إزاي تحدث موبايل Xiaomi 15 لـ HyperOS 3؟
اتبع الخطوات دي:
- افتح الإعدادات
- اختار حول الهاتف
- اختار تحديثات النظام
- اضغط بحث عن تحديث
نصيحة مهمة: قبل التحديث اعمل نسخة احتياطية لملفاتك، واتأكد إن البطارية فوق 50%.
