زي ما كنا متوقعين، أبل أخيرًا أطلقت النسخة التجريبية العامة الأولى من نظام iOS 26، واللي بتكون مناسبة للمستخدمين اللي حابين يجربوا التحديث الجديد بس مش حابين يركبوا نسخة المطورين.
أبل كانت أعلنت عن تحديث iOS 26 في مؤتمر WWDC، ومن وقتها أطلقت 4 نسخ تجريبية للمطورين. دلوقتي، وبعد صدور النسخة الرابعة للمطورين، أبل أعادت إصدارها علشان تتماشى مع نفس رقم البناء بتاع النسخة العامة، اللي هو 23A5297m.
أجهزة آيفون اللي تقدر تركب iOS 26 التجريبية العامة
التحديث متاح لكل أجهزة iPhone 11 وما بعده، وبيكون التحديث كبير في الحجم، ممكن يوصل لأكتر من 9 جيجا، فأنصحك تحمل التحديث عن طريق الواي فاي.
أبرز مميزات iOS 26
التحديث الجديد بيقدم تصميم جديد باسم Liquid Glass، واللي أكيد شفت لقطات ليه على الإنترنت. كمان، النسخة التجريبية الأولى للمطورين كانت مليانة مشاكل، لكن مع الإصدار الرابع الموضوع اتحسّن بشكل كبير، والنسخة العامة دلوقتي تعتبر مستقرة نسبيًا.
رغم كده، بما إن النظام لسه في مرحلة تجريبية، طبيعي تلاقي شوية مشاكل أو أخطاء.
ازاي تحمل iOS 26 النسخة العامة على موبايلك؟
لو حابب تجرب iOS 26، تقدر تحمّله كالتالي:
- ادخل على الإعدادات (Settings)
- اختار عام (General)
- اضغط على تحديث البرامج (Software Update)
- ادخل على Beta Updates واختر iOS 26 Public Beta
- ارجع لتحديث البرامج، وهتلاقي التحديث ظهر عندك
ولو كنت على نسخة المطورين، تقدر برضو تنتقل للنسخة العامة بنفس الطريقة.
نصيحة مهمة قبل التحديث
قبل ما تنزل التحديث، اعمل نسخة احتياطية من بياناتك، سواء على iCloud أو على الكمبيوتر، علشان لو حبيت ترجع للإصدار القديم تقدر بسهولة.
