مراجعة Xiaomi 15T وحش جديد من شاومي بسعر خرافي وتصميم فاخر وكاميرات لايكا

شاومي راجعة بقوة في نهاية 2025 بهاتفها الجديد Xiaomi 15T، واللي بيكمل سلسلة الـT المشهورة بالتوازن بين الأداء القوي والسعر المعقول. الموبايل بييجي بتصميم أنيق، شاشة AMOLED 6.83 بوصة ساطعة جدًا، ومعالج Dimensity 8400 Ultra اللي بيقدّم أداء ثابت وسلس في كل المواقف.

الـ15T كمان جاي بكاميرات Leica محسّنة بتقدّم صور وتفاصيل قوية جدًا، وبطارية 5500 مللي أمبير تكمل اليوم بسهولة مع شحن سريع 67 واط. صحيح مش أقوى موبايل في الفئة، لكنه بيقدّم تجربة فلاجشيب حقيقية بسعر أقل من 500 يورو، وده يخليه اختيار ممتاز لأي حد عايز موبايل متكامل وسعره مناسب.

التصميم وجودة التصنيع – بسيط لكن أنيق

ييجي Xiaomi 15T بتصميم كلاسيكي جدًا، ممكن نقول عليه “تقليدي وأنيق في نفس الوقت”. الموبايل شكله هادي جدًا ومش ملفت للانتباه بشكل مبالغ فيه، وده بيخليه يليق في أي مكان أو مناسبة.

الهيكل العام للموبايل بيدّي إحساس قريب جدًا من تصميم الآيفون، وده واضح إن شاومي متأثرة بتصميم موبايلات أبل اللي فيها جوانب مسطحة وزوايا دائرية. التصميم ده بيخلي الموبايل مريح في الإيد وسهل المسكة، وكمان بيدي إحساس بالصلابة والثبات.

الجميل إن جسم الموبايل مفيهوش أي مرونة أو “تطبّق”، رغم إن الإطار الجانبي مصنوع من البلاستيك. كمان الظهر مش بيعمل صوت فراغ أو بيحسسك إنه مجوّف، وده دليل على جودة التصنيع العالية.

من ناحية الخامات، الموبايل جاي بتصميم “ساندويتش” كلاسيكي، يعني زجاج Gorilla Glass 7i من الأمام لحماية الشاشة، وظهر مصنوع من مادة الفايبرجلاس (مش زجاج بالكامل، لكن متين جدًا وخفيف في الوزن).

ومن الحاجات الكويسة إن لا الظهر ولا الإطار بيتبصم بسهولة، يعني مش هتضطر تمسحه كل شوية.

شاومي كمان ضافت لمسة بسيطة وجميلة على التصميم، وهي الحافة اللامعة اللي حوالين جزيرة الكاميرات، ودي بتدي شكل مميز شوية من غير ما تكون مبالغ فيها. كمان ترتيب الكاميرات نفسه متماثل وشكله أنيق جدًا.

الموبايل متوفر بثلاث ألوان الأسود , الرمادي , الذهبي الوردي

والألوان دي كلها جاية مع إطار بنفس اللون، والإطار معمول بشكل يخليه يبان كأنه معدن فعلاً، خصوصًا من بعيد، وده بيدي إحساس ممتاز بالفخامة.

من ناحية الأزرار، التصميم بسيط:

• الجنب الشمال فاضي تمامًا،
• أما اليمين ففيه زر الباور وأزرار التحكم في الصوت.
• في الأسفل فيه درج شريحتين Nano-SIM، والسماعة السفلية، والميكروفون الرئيسي، ومنفذ USB-C.
• الجزء العلوي فاضي تقريبًا، وده بيدي شكل نظيف.

ومن الحاجات اللي بتميز الموبايل، وجود مستشعر الأشعة تحت الحمراء (IR Blaster)، مدمج بشكل ذكي في الجهة الخلفية جنب واحدة من الكاميرات، وده بيسمحلك تستخدم الموبايل كريموت لأي جهاز.

أما المستشعرات الأمامية زي مستشعر الضوء والقرب فهي مخفية كويس جدًا ناحية اليمين جنب الكاميرا الأمامية اللي جايه على شكل ثقب صغير جدًا، ومش مزعج إطلاقًا. كمان حواف الشاشة رفيعة جدًا وبتدي إحساس ممتاز بالحداثة.

وبيجي الموبايل بـ مستشعر بصمة مدمج تحت الشاشة من النوع البصري، وبيشتغل بسرعة ودقة ممتازة، ومكانه كمان مريح جدًا للإيد، ومفيش عليه أي ملاحظات.

شاشة مبهرة بتجربة عرض احترافية

شاومي دايمًا مابتبخلش على المستخدمين في جودة الشاشة، وموبايل Xiaomi 15T بيأكد ده وبقوة. الموبايل جاي بشاشة AMOLED ضخمة مقاس 6.83 بوصة، بدقة ألوان 12 بت، ودعم لتقنيات HDR10+ وDolby Vision، مع سطوع بيصل لحد 3200 شمعة — يعني هتشوف بوضوح حتى تحت الشمس المباشرة.

في الاختبارات، الموبايل قدر يحقق حوالي 618 شمعة عند أعلى سطوع يدوي، ووصل لحد 1525 شمعة في الوضع التلقائي لما بيتعرض لضوء قوي. بمعنى أبسط: الشاشة ممتازة للاستخدام في أي إضاءة.

أما عن معدل التحديث، فالشاشة بتدعم تردد 120 هرتز لتجربة أكثر سلاسة، خصوصًا أثناء التصفح أو اللعب. هي مش بتستخدم تقنية LTPO المتطورة زي بعض الموبايلات التانية، لكنها بتقدر تغير بين 60Hz و120Hz حسب الاستخدام، وده بيساعد في توفير البطارية من غير ما تقل جودة التجربة.

البطارية : –

جوه الموبايل بطارية 5500 مللي أمبير، ودي بتقدّم أداء ممتاز جدًا. في الاختبارات، Xiaomi 15T قدر يحقق حوالي 15 ساعة استخدام متواصل، وده رقم ممتاز يخليك مطمن إن الموبايل هيكمل معاك اليوم بسهولة حتى مع استخدام مكثف.

رغم إن الموبايل مش فلاكشيب، إلا إن الشحن السريع فيه كويس. الشاحن 67 واط بيقدر يوصّل البطارية لـ39% في أول ربع ساعة، و69% في نص ساعة، ويكمل شحن كامل في حوالي 51 دقيقة. أرقام حلوة، لكن مش بنفس سرعة موبايلات شاومي الأغلى اللي بتوصل لـ120 واط.

الصوت والأتصالات : –

الموبايل بييجي بـسماعتين ستيريو (واحدة فوق وواحدة تحت) بيقدموا صوت متوازن وقوي. السماعة اللي فوق كمان بتشتغل كـسماعة مكالمات، وده بيدي تجربة صوت أوضح. الصوت عالي وواضح جدًا، والباس كويس بالنسبة لحجم الموبايل، لكن ممكن نقول إن تفاصيل الصوت كانت محتاجة تبقى أوضح شوية في الأصوات البشرية.

الـXiaomi 15T بيدعم شبكات 5G (من نوع SA/NSA Sub-6) ومعاه مدخلين Nano-SIM + دعم لـeSIM، بس مفيش مدخل كارت ميموري. كمان بيدعم Wi-Fi 6E السريع جدًا على تردد 6 جيجاهرتز، وBluetooth 6.0، وNFC في بعض الأسواق، وكالعادة IR Blaster للتحكم في الأجهزة.

الموبايل مفيهوش مدخل 3.5مم، ووصلة USB-C فيه بتشتغل بسرعة نقل بيانات لحد 480 ميجابِت (USB 2.0)، ومفيش دعم لإخراج الفيديو من الموبايل. كمان فيه مجموعة حساسات متطورة زي مقياس التسارع، الجيروسكوب، البوصلة، وحساس الضوء، لكن مفيش حساس تقارب فعلي وده استبدلوه بنظام افتراضي بيشتغل كويس أغلب الوقت.

تجربة الأداء والنظام

موبايل Xiaomi 15T بييجي بنظام Android 15 ومعاه واجهة HyperOS 2 الجديدة من شاومي، واللي فيها تحسينات كبيرة في الأداء وشكل النظام. شاومي وعدت إن الموبايل هيوصل له 4 تحديثات رئيسية للنظام وتحديثات أمان لمدة 6 سنين، نفس الدعم اللي بتحصل عليه النسخة الأغلى Xiaomi 15 Ultra، وده شيء ممتاز جدًا.

واجهة HyperOS 2 شكلها مألوف لأي حد استخدم MIUI قبل كده، بس فيها تحسينات في السرعة والانسيابية، مع شوية لمسات ذكية. النظام بقى أنظف وأخف، وكمان بيدعم الذكاء الاصطناعي بشكل واسع جدًا. الموبايل بيديك حرية اختيار بين واجهة فيها درج تطبيقات أو إن كل التطبيقات تكون على الشاشة الرئيسية، كمان فيه وضع “خفيف” بيكبر الأيقونات ويسهّل الاستخدام، خصوصًا للي بيحب البساطة.

الواجهة فيها مركز إشعارات وتحكم منفصلين زي واجهة شاومي الحديثة، وممكن تحط ودجتس وأيقونات كبيرة أو مجلدات ذكية، وكمان صفحة Google Discover متاحة على الشمال.

الذكاء الاصطناعي في كل حتة

الذكاء الاصطناعي واخد مساحة كبيرة جدًا في HyperOS 2. الموبايل بيحتوي على Google Gemini اللي تقدر تسأله أي حاجة أو تطلب منه يولّد صور أو نصوص. كمان فيه خاصية Circle to Search اللي بتخليك تدور على أي حاجة في الشاشة بسهولة.

شاومي ضافت مجموعة كبيرة من خواص الذكاء الاصطناعي الخاصة بيها، ومتقسمة بشكل منظم في الإعدادات عشان تقدر توصلها بسهولة. تطبيق الملاحظات مثلاً بيقدر يلخّص أو يترجم النصوص أو ينسقها تلقائيًا، وتطبيق المعرض بيقدر يحذف عناصر من الصور أو يمد الخلفية أو حتى يولّد صور جديدة.

كمان فيه مسجل الصوت الذكي اللي بيحوّل الكلام لنص ويفصل بين المتحدثين، ويقدر كمان يترجم الكلام ده. وميزة الترجمة الفورية بتخليك تترجم أثناء المكالمات أو وجهاً لوجه. ده غير إن النظام فيه ترجمة تلقائية للفيديوهات بخاصية الترجمة الذكية.

شاومي بتعتمد على المعالجة السحابية لبعض المميزات دي، لكن الجميل إن كل ده مجاني دلوقتي بدون أي اشتراك.

أداء المعالج وتجربة الاستخدام

موبايل Xiaomi 15T بييجي بمعالج MediaTek Dimensity 8400 Ultra، وده معالج قوي جدًا بيقدّم أداء ممتاز سواء في الاستخدام اليومي أو الألعاب. النسخة البرو فيها معالج أقوى شوية (Dimensity 9400+)، لكن الأداء هنا فعلاً مميز ومش بعيد عن الفئة العليا.

المعالج فيه 8 أنوية، منها نواة أساسية بتردد 3.25 جيجاهرتز، وثلاث أنوية بتردد 3.0 جيجاهرتز، وأربع أنوية موفرة للطاقة بتردد 2.1 جيجاهرتز. ومعاه معالج رسوميات Mali-G720 MC7 اللي بيقدّم تجربة ألعاب مستقرة جدًا.

الموبايل جاي بـ12 جيجا رام LPDDR5X وذاكرة تخزين 256 أو 512 جيجا UFS 4.1 السريعة جدًا. النتائج في الاختبارات بتأكد إن الأداء قريب جدًا من Snapdragon 8 Gen 3 في المعالجة، وبيقدّم تجربة ممتازة في الاستخدام اليومي والتطبيقات الثقيلة.

في موضوع السخونة، Xiaomi 15T بيتعامل معاها بشكل كويس جدًا. فعلاً جسم الموبايل بيسخن شوية تحت الضغط أو مع الألعاب، لكنه عمره ما بيبقى مزعج أو صعب تمسكه. النظام الحراري في الموبايل بيقدر يسحب الحرارة من المعالج بكفاءة، وده واضح في اختبارات الإجهاد الطويلة اللي بيحافظ فيها الموبايل على أداء ثابت بدون انخفاض ملحوظ.

كاميرات شاومي 15T – تصوير احترافي بجودة عالية

موبايل Xiaomi 15T بييجي بتصميم كاميرا ثلاثية شكلها قريب من الجيل اللي قبله، لكن شاومي غيّرت حاجات مهمة في الحساسات عشان تحسّن التجربة.
الكاميرا الرئيسية هنا بقت تعتمد على حساس Omnivision OV50 Light Hunter 800 بدل الحساس بتاع سوني اللي كان في النسخة اللي قبلها.
الحساس ده حجمه 1/1.55 إنش وبيقدّم صور بدقة عالية مع فتحة عدسة f/1.7 ومعاه تثبيت بصري OIS وتركيز تلقائي PDAF، يعني أداء ممتاز في الإضاءة المختلفة.

الكاميرا التانية هي تيليفوتو 2x للتقريب البصري، ودي بقت تعتمد على حساس Samsung ISOCELL JN5 بدل الـJN1 القديم، بدقة 50 ميجابكسل وعدسة f/1.9.
رغم إنها مافيهاش تثبيت بصري، لكنها بتقدّم صور نقية جدًا وألوان متوازنة، خصوصًا في الإضاءة الكويسة.

أما الكاميرا التالتة فهي العدسة الواسعة Ultra Wide بدقة 12 ميجابكسل (حساس OV13B من Omnivision)، وبتغطي زاوية عريضة جدًا من غير تشوهات واضحة، لكن مافيهاش فوكس تلقائي.

السيلفي بقى بكاميرا 32 ميجابكسل من Samsung KD1، نفس اللي في Xiaomi 14T، وبتدي صور كويسة في الإضاءة العالية، لكن الجودة ممكن تكون أفضل في الإضاءة الضعيفة.

الموبايل بيدعم نظام التصوير الجديد Xiaomi AISP 2.0 اللي بيستخدم معالجة ذكية للصور عشان تطلع ألوان واقعية وتفاصيل أدق.
كمان بيدعم Ultra HDR زي موبايلات سامسونج وجوجل، فهتشوف الصور بألوان مشبعة وتفاصيل قوية في المعرض.

زي معظم موبايلات شاومي الحديثة، عندك وضعين رئيسيين للتصوير من Leica:

• Leica Authentic: بيقدّم ألوان طبيعية وتباين محافظ.
• Leica Vibrant: بيخلي الصور أنعم وألوانها أزهي وأنضف.

والصور اللي اتجربت كانت كلها بوضع Leica Vibrant الافتراضي.

الكاميرا الرئيسية بتقدّم صور ممتازة بدقة حوالي 12.5 ميجابكسل بعد الدمج، والتفاصيل فيها واضحة جدًا حتى لما تقرّب الصورة.
ألوانها مشبعة وشكلها طبيعي، ومعالجة الصورة ممتازة.
بس كان ممكن التباين يكون أعلى سنة، لأن في بعض الحالات الصورة بتكون ناعمة شوية.

الكاميرا التيليفوتو بتقدّم صور ممتازة هي كمان، خصوصًا في صور الأشخاص والتفاصيل البعيدة، وبتحافظ على نفس ألوان الكاميرا الرئيسية.
أما لو استخدمت زووم رقمي 5x فالجودة بتقل شوية، ودي نقطة لصالح النسخة البرو اللي فيها تقريب بصري حقيقي.

الكاميرا الواسعة (Ultra Wide) بتطلع صور كويسة جدًا بالنسبة لمواصفاتها، فيها تفاصيل مقبولة وألوان حلوة، بس كان ممكن تكون أفضل لو فيها تركيز تلقائي عشان تشتغل كـماكرو كمان.

أداء Xiaomi 15T في الليل ممتاز جدًا، التفاصيل بتفضل واضحة والضوء متوزع كويس، والـHDR شغال تلقائي بيوازن الإضاءة.
الكاميرا الرئيسية بتقدّم صور نظيفة ومليانة تفاصيل، حتى في الإضاءة الضعيفة.
الكاميرا التيليفوتو كمان بتقدّم نتائج كويسة جدًا مع نسبة بسيطة من النعومة.
العدسة الواسعة بتضعف شوية في الإضاءة المنخفضة لكنها بتدي صور قابلة للاستخدام.

الموبايل بيصور فيديو بدقة 4K لحد 60 فريم في الثانية بالكاميرا الرئيسية والتيليفوتو، والعدسة الواسعة بتقف عند 4K@30fps.
الجودة ممتازة جدًا والتفاصيل واضحة، ومعالجة الألوان فيها توازن جميل.
الفيديوهات بتتسجل بصيغة HEVC (h.265) لتوفير المساحة، أو ممكن تغيّرها لـh.264 لو حابب توافق أكتر مع الأجهزة القديمة.

الصوت كمان بيتسجل استريو واضح، وده بيخلي تجربة الفيديو قريبة جدًا من الموبايلات الأغلى سعرًا.

الخلاصة – رأينا النهائي ومميزات وعيوب شاومي 15T

المنافسة

شاومي 15T نزل رسميًا بسعر حوالي 649 يورو، لكن بعد أسابيع قليلة من إطلاقه بقى متوفر أونلاين بسعر بين 480 و500 يورو في أوروبا، وده بيحطه في فئة سعرية صعبة مليانة موبايلات جامدة جدًا سواء من الفئة فوق المتوسطة أو فلاجشيب السنة اللي فاتت.

الموبايل بيقدم خلطة قوية تجمع بين كاميرات Leica، وتصميم أنيق، وشاشة AMOLED بتردد 120 هرتز وسطوع عالي، وكمان مقاومة مياه وغبار بمعيار IP68. يعني باختصار، بتحس إنك ماسك فلاجشيب بس بسعر معقول جدًا.

أقرب منافس ليه هو Xiaomi 14T Pro من نفس العيلة. سعره تقريبًا متقارب، لكنه بييجي بمعالج Dimensity 9300+ الأقوى وشحن أسرع 120 واط بالإضافة لدعم الشحن اللاسلكي، اللي شاومي 15T مش بيقدمه. بس في المقابل، 15T عنده شاشة أكبر 6.83 بوصة، وبطارية أكبر 5500 مللي أمبير، وهيكل أخف وأنحف. فلو بتدور على موبايل مريح ومش بيسخن، فهو اختيار منطقي أكتر.

أما المنافس من برة منظومة شاومي فهو Galaxy S25 FE من سامسونج. سعره حوالي 550 يورو، لكنه بيوفر دعم تحديثات لمدة 7 سنين وشاشة LTPO AMOLED بتردد متغير لحد 1 هرتز لتوفير البطارية، بجانب الشحن اللاسلكي والـQi2. في المقابل، 15T بيتفوق في البطارية الأكبر، والشاشة الأوضح، وتجربة التصوير الليكّا اللي بتدي صور HDR أعمق وأنعم.

لو بتدور على الأداء مقابل السعر، فموبايل Poco F7 داخل المنافسة بقوة، وسعره حوالي 365 يورو. المعالج Snapdragon 8s Gen 4 أقوى على الورق، وبطاريته ضخمة 6500 مللي أمبير مع شحن 90 واط. لكن هتخسر في الكاميرات والتصميم الفخم.

أما OnePlus Nord 5 فهو قريب في السعر (حوالي 459 يورو) وبمعالج Snapdragon 8s Gen 3، وأداءه قريب جدًا من شاومي 15T. بس شاشة 15T أحسن، ومقاومته للمياه IP68 بدل IP65، وكمان كاميراته أفضل خصوصًا في الفيديو الـHDR.

بشكل عام، شاومي 15T قدر يثبت نفسه وسط الزحمة دي. مش الأسرع في الأداء ولا الشحن، لكنه بيقدم تجربة متكاملة ومتوازنة جدًا تجمع بين شاشة فخمة، كاميرات قوية، بطارية ممتازة، وسعر منطقي بعد الإطلاق.

رأينا النهائي

شاومي 15T بيكمل نفس فكرة سلسلة الـT من شاومي — موبايل شبه الفلاجشيب في كل حاجة بس بسعر معقول. إحساس الموبايل في الإيد ممتاز، والخامات رغم إنها بلاستيك إلا إنها قوية ومريحة. كمان بيدعم مقاومة مياه وغبار IP68 بعمق لحد 3 متر، ودي حاجة نادرة في الفئة دي.

الشاشة هنا نجمة العرض — لوحة AMOLED ضخمة 6.83 بوصة، سطوعها عالي جدًا وترددها 120Hz، فهتستمتع فعلاً بالمشاهدة والألعاب. الأداء كمان ثابت بفضل معالج Dimensity 8400 Ultra ونظام التبريد IceLoop اللي بيخلي الموبايل ما يسخنش حتى في الاستخدام التقيل.

بطارية 5500 مللي أمبير بتكمل معاك اليوم بكل راحة، والشحن 67 واط لسه سريع كفاية (حوالي 50 دقيقة للشحن الكامل). النظام HyperOS 2 المبني على أندرويد 15 شغال بسلاسة، وساير التطور بالذكاء الاصطناعي ودمج Google Gemini. شاومي كمان وعدت بـ4 تحديثات نظام و6 سنين أمان، وده تقدم كبير.

الكاميرات الليكّا بتكمل الصورة — العدسة الرئيسية 50 ميجا بتقدم صور ممتازة في الإضاءة القوية، والـ2x تليفوتو بتدي تفاصيل حلوة جدًا، حتى لو مفيهاش OIS. العدسة الواسعة أضعفهم لكنها لسه بتدي نتائج كويسة. الفيديوهات 4K HDR10+ ممتازة من ناحية التثبيت والألوان.

في المقابل، في شوية تنازلات زي الخامة البلاستيك، مفيش شحن لاسلكي، والكاميرا السيلفي أداءها عادي. كمان الصوت محتاج يكون فيه عمق أكتر. لكن الحاجات دي مش عيوب قاتلة، خصوصًا لو بصينا للسعر.

في النهاية، شاومي 15T يعتبر من أكتر الموبايلات المتكاملة في الفئة دي. مش الأفضل في كل نقطة، لكنه بيجمع أهم الحاجات اللي المستخدم المصري بيدور عليها: شاشة ممتازة، أداء ثابت، بطارية محترمة، وكاميرات قوية. موبايل فعلاً يستحق التوصية.

فتح علبة شاومي 15T

موبايل Xiaomi 15T بييجي في علبة بسيطة وأنيقة من الكرتون المقوى، خالية تقريبًا من البلاستيك وبتحافظ على الموبايل كويس أثناء النقل. جوا العلبة هتلاقي كفر سيليكون شفاف، وكابل USB Type-C، لكن الشاحن مش موجود في النسخة الأوروبية، فاسأل التاجر لو متاح ضمن العرض. الملصق الأوروبي بيأكد إن الموبايل حاصل على كفاءة A، ومقاوم للمياه والأتربة بمعيار IP68.

مميزات Xiaomi 15T

عيوب Xiaomi 15T